Азийн Хөгжлийн банк болон Европын Хөрөнгө Оруулалтын банкны хөнгөлөлттэй зээлээр хэрэгжүүлж буй “Гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийн хүрээнд Ус сувгийн удирдах газрын үйл ажиллагааг сайжруулах дэд төслийг хэрэгжүүлж байна. УСУГ-ын үйл ажиллагааг сайжруулах уг дэд төслийн үр дүнд УСУГ-т нэгдсэн удирдлагын СКАДА систем байгуулж, үүнд шаардагдах тоног төхөөрөмжүүдийг шинэчлэн сайжруулснаар усны алдагдлыг илрүүлэх зэргээр үйл ажиллагааны горимыг сайжруулж, ус, эрчим хүчний хэмнэлт үүсгэн ашиглалтын зардлыг бууруулах юм.

АХБ-ны буцалтгүй тусламжийн санхүүжилттэй уг дэд төслийн хүрээнд Төвийн болон Үйлдвэрийн насос станцын тоног төхөөрөмжийн шинэчлэлтийн ажил бүрэн хийгдэж дууссан байна. Тоног төхөөрөмжийн шинэчлэлтийн хүрээнд Үйлдвэрийн насос станцад 1 өргөгчийн насос станцын гүний худгийн 16 ширхэг насосыг иж бүрнээр нь шинэчлэн суурилуулж, ашиглалтад оруулав. Мөн Төвийн насос станцын эх үүсвэрийн 2 өргөгчийн 4 насос, 6 кВ-ын давтамж хувиргагчийг барилгын хамт барьж ашиглалтад оруулан УСУГ-т 2017 оны 11 сарын 8-нд хүлээлгэн өглөө. Нээлтийн арга хэмжээнд Нийслэлийн дэд бүтэц, гэр хорооллын хөгжлийн асуудал хариуцсан орлогч, төслийн захирал П.Баярхүү, АХБ-ны Хот төлөвлөлтийн ахлах мэрэгжилтэн ноён Arnaud Heckmann, Төслийн зохицуулагч Д.Авирмэд,   Төслийн дэд зохицуулагч Д.Мөнхжаргал, УСУГ-ын дарга Ц.Төрхүү болон гүйцэтгэгч “Комфорт Импекс” ХК-ний удирдлагууд оролцон уг шинэчлэлийн ажлын талаар санал сэтгэгдлээ хуваалцлаа.                        

Улаанбаатар хотын хүн амын өсөлтийг даган өдрөөс өдөрт нэмэгдэж буй усны хэрэглээг хангахад нэн тэргүүнд шаардлагатай тоног төхөөрөмжүүдийг шинэчлэн, хүчин чадлыг нэмэгдүүлэн, найдвартай ажиллагааг хангах нь стратегийн хувьд чухал ач холбогдолтой.

Тоног төхөөрөмжийн шинэчлэлийн үр дүнд хэрэглээнд суурилсан насосын ажиллагаатай болж цахилгаан эрчим хүчийг 15-30 хувь, цэвэр усны 5-10 хувь хэмнэх тооцоо гарсан байна.