“Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийн зүгээс ахлах ангийн сурагчдад хорт зуршил, түүнээс урьдчилан сэргийлэх арга замын талаар мэдлэг олгох зорилготой "Өөрийн өдөөгчийг ол" сургалтыг Толгойт дэд төвийн 42, 106 дугаар сургуулийн ахлах ангийн сурагчдын дунд зохион байгууллаа. Сургалт 2025 оны 1 дүгээр улиралд болсон ба сургалтыг хамтран зохион байгуулагчаар СХД-ийн Хүүхэд, гэр бүлийн хөгжил хамгааллын хэлтэс, сургалтын чиглүүлэгч багшаар “Зөв дадал” ТББ-ын сургагч багш ажиллав. Сургалтын үеэр төслийн ерөнхий танилцуулга болон Толгойт дэд төвийн танилцуулга мэдээлэл хүргэв.

Нийт 4 удаагийн сургалтаар 227 (53.5%) охид, 197 (46.5%) хөвгүүд буюу нийт 424 сурагч хамрагдсан. Сургалтаар хорт зуршил гэж юу вэ, түүнээс үүсэж болзошгүй хорт үр дагавар, аливаа дадал зуршлыг бий болгох механизмын талаар мэдээлэл өглөө. Анхны авсан тав тухтай мэдрэмж нь ихэвчлэн хор хөнөөлтэй зуршлыг бий болгодог гэдгийг ойлгоход гол анхаарал хандуулсан. Оролцогчид сөрөг сэтгэл хөдлөлөө хэрхэн тайвшруулж, үр дүнтэй удирдах эрүүл аргуудын талаар хэлэлцүүлэг өрнүүлэв. Мөн найз нөхдийн зан байдал, ганцаардал, хувийн дадал зуршлууд хэрхэн өдөөгч болдог, түүнээс хэрхэн урьдчилан сэргийлэх талаар зөвлөмж өглөө. Урьдчилан сэргийлэх хамгийн чухал хэрэгсэл бол сонор сэрэмж, мэдлэгийн ач холбогдлыг онцлон тэмдэглэв.