Нийслэлийн Засаг Даргын тамгын газраас Азийн Хөгжлийн Банк болон Европын хөрөнгө оруулалтын банкны хөнгөлөлттэй зээлээр хэрэгжүүлж буй “Гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийн нэгдүгээр шатны ажлын явцтай танилцахаар Азийн Хөгжлийн Банкны дэд захирал Мухаммэд Сами Саед, Азийн Хөгжлийн Банкны Эдийн засаг стратеги төлөвлөлтийн газрын Монгол дахь суурин төлөөлөгч Деклан Магээ болон хот төлөвлөлтийн мэргэжилтэн Арнауд Хекманэ нар 2017 оны 10-р сарын 12-ны өдөр “Сэлбэ” дэд төв дээр баригдсан 50 айлын орон сууцаар зочиллоо.

Төлөөлөгчдийг төслийн дэд зохицуулагч Д.Мөнхжаргал болон хяналт-шинжилгээ, үнэлгээний мэргэжилтэн Н.Болороо нар угтан авч уулзсан юм. Уулзалтын үеэр төлөөлөгчид төслийн хүрээнд хийгдэж буй ажлын биелэлт, үр дүнгийн мэдээлэл авч, дэд төвд баригдах цэцэрлэгийн төлөвлөлтийн зурагтай танилцав.

Үүний дараагаар “Сэлбэ” дэд төвд баригдах Дулааны станцын газар дээр нь очиж гүйцэтгэгч компани “Хүрд” ХХК-ийн удирдлага, ажилтнуудтай уулзан, уг станцын хүчин чадал, баригдсанаар тус дэд төвийн иргэдийн эрүүл мэнд, ахуй амьдрал болон нийслэлийн хот төлөвлөлтөд өгөх өгөөж, хүртээмжийн талаар асууж ярилцлаа. Уулзалтын үеэр ноён Мухаммэд Сами Саед төслийн хоёрдугаар үе шатны бэлтгэл ажлын талаар лавлаж, зээлийн гэрээнд гарын үсэг зурах ажлыг шуурхайлах шаардлагатай байгааг онцолсон байна.

“Сэлбэ” дэд төвд шинээр баригдах Дулааны станцын газар дээр очиж гүйцэтгэгч компанийн ажилчидтай уулзлаа.